சென்னை / நியூடெல்லி:
நாடு முழுவதும் இன்று (ஆகஸ்ட் 15, 2025) 79வது சுதந்திர தினம் மிகுந்த உற்சாகத்துடன் கொண்டாடப்படுகிறது. காலை 7.30 மணிக்கு டெல்லி செங்கோட்டையில் பிரதமர் நரேந்திர மோடி தேசிய மூவர்ணக் கொடியை 12வது முறையாக ஏற்றி, நாட்டு மக்களுக்கான உரையாற்றினார்.
தமிழகத்தில், சென்னை செயிண்ட் ஜார்ஜ் கோட்டை கொத்தளத்தில் முதல்வர் மு.க. ஸ்டாலின் தேசியக் கொடியை ஏற்றி, சுதந்திர தின வாழ்த்துகளைப் பகிர்ந்தார்.
அரசியல் தலைவர்களின் வாழ்த்து செய்திகள்
முதல்வர் மு.க. ஸ்டாலின்
“சமத்துவம், கண்ணியம், மரியாதையுடன் வாழ்வதே சுதந்திர போராளிகளின் இலக்கு. ஜனநாயகத்தை திருட முடியாத, வாக்குகள் மதிக்கப்படும் தேசத்தை உருவாக்குவோம். மதவெறி, பாகுபாடு, ஒடுக்குமுறையை ஒழிப்பதே உண்மையான சுதந்திரம்.”
தவெக தலைவர் விஜய்
“மதச்சார்பற்ற சமூகநீதியே சமத்துவச் சமூகத்திற்கான பாதை. மதச்சார்பின்மை, சகோதரத்துவம், நல்லிணக்கம் நிலைத்திட வாழ்த்துக்கள். நம் சுதந்திரத்திற்காக உயிர்நீத்த வீரர்களின் தியாகத்தை என்றும் நினைவில் கொள்ள வேண்டும்.”
‘விக்சித் பாரத்’ – 2047 நோக்கில் பிரதமர் மோடியின் கனவு
இந்தாண்டு சுதந்திர தினத்தின் கருப்பொருள் ‘விக்சித் பாரத்’ (வளர்ந்த இந்தியா). 2047க்குள் இந்தியாவை முழுமையாக முன்னேற்றமடைந்த நாடாக மாற்றுவது பிரதமரின் பிரதான குறிக்கோள்.
பிரதமர் தனது உரையில்,
- பொருளாதார வளர்ச்சி
- உள்கட்டமைப்பு மேம்பாடு
- பெண்கள் மற்றும் இளைஞர்களின் முன்னேற்றம்
- பசுமைப் பொருளாதாரம்
- தேசிய ஒற்றுமை
ஆகியவை முக்கிய முன்னுரிமைகள் என வலியுறுத்தினார்.
சுமார் 6,000 விருந்தினர்கள், உயர்மட்ட அரசு அதிகாரிகள், பாதுகாப்புப் படையினர், மற்றும் பொதுமக்கள் நிகழ்ச்சியில் கலந்து கொண்டனர். தேசியக் கொடி ஏற்றப்பட்டபோது ஹெலிகாப்டரில் இருந்து மலர்கள் தூவப்பட்டு, “Operation Sindoor” கொடி வானில் பறந்தது பார்வையாளர்களின் மனதை கவர்ந்தது.
‘ஆபரேஷன் சிந்தூர்’ – வீரர்களுக்கு பிரதமரின் வணக்கம்
பஹல்காம் பயங்கரவாதத் தாக்குதலுக்கு எதிரான ஆபரேஷன் சிந்தூர் வெற்றியை பிரதமர் பாராட்டினார்.
“நமது துணிச்சலான வீரர்கள் எதிரியை கற்பனைக்கு அப்பாற்பட்டு தண்டித்துள்ளனர். செங்கோட்டையிலிருந்து அவர்களுக்கு வணக்கம் செலுத்துவதில் பெருமைப்படுகிறேன்,” என அவர் தெரிவித்தார்.
ஊழியர்களை தக்கவைக்க கோடிக்கணக்கில் போனஸ் அறிவித்த OpenAI – Chatgpt
சிந்து நதி நீர் ஒப்பந்தம் – “அநீதியானது”
சிந்து நதி நீர் ஒப்பந்தம் ஒருதலைப்பட்சமானது, அநீதியானது என பிரதமர் கூறினார்.
“நமது விவசாயிகளுக்கு தண்ணீர் பறிக்கப்பட்ட நிலையில், எதிரி நாடு நமது நதிநீரை பயன்படுத்தியது ஏற்றுக்கொள்ள முடியாது. இனி இரத்தமும் தண்ணீரும் ஒன்றாகப் பாயாது,” என்று அவர் எச்சரித்தார்.
தேசிய பாதுகாப்பு – கடுமையான எச்சரிக்கை
பயங்கரவாதத்தையும், அதை ஆதரிப்பவர்களையும் ஒரே வகையில் எதிர்கொள்வோம் என பிரதமர் தெளிவுபடுத்தினார்.
“அவர்கள் இருவரும் மனிதகுலத்தின் பொதுவான எதிரிகள்; அவர்களுக்கு எந்த கருணையும் காட்டப்படாது,” என்று உறுதியளித்தார்.
சுதந்திர தினத்தின் உண்மையான செய்தி
79வது சுதந்திர தினம், சுதந்திர போராட்ட வீரர்களின் தியாகத்தையும், எதிர்கால வளர்ச்சிக்கான தேசிய உறுதியையும் நினைவூட்டும் நாளாகவும், ‘விக்சித் பாரத்’ நோக்கில் இந்தியா நகரும் பாதையை சுட்டிக்காட்டும் நாளாகவும் அமைந்துள்ளது.
Leave a Reply